Pälzer G´schicht

!! DIE G´SCHICHT ZUM FESCHT !!

HAMBACH schun 865 urkundlisch erwähnt - wer räschne kann, wäs, dass mer des Johr 1150 Johrfeier hän.... do is mol rischtisch was los !! & die Wiesche der Demokradie Noch em Wiener Kongress fiel unser schänes pälzer Land an des altmodische bayrische Känischreich. Un die Bazi hän ,mit ihre Steiern & Zölle, uns Pälzer die letschde Penning aus de Hossedasch gezoche. Wäschd wie ich mähn? So rischdisch wie e warmi Gans, wollden se uns ausnemme. Die Wagges hän sich dann achtzehhunnertdreisisch in ärer Juli-Revolution oständisch gewehrt. Un..... was hod de Känisch, der alde Labbedudel gemacht..... ...der hod die Daumeschraub noch engger gezoche. Mei liewer Scholli, do hoscht nirchens mer Babble kenne was gedenkt hoscht. Sogar des Dachesblättle hän se kontrolliert. Jesses er Leid ehr Kinner ….nääää. Kenner hät mer sei Gosch uffmache solle. Awwer do hän se sich mol so richdisch gschnerrt. Mer Hambacher , alle voraus em Siebenpfeiffer sein Philipp-Jakob & dem sei Spezi , de Johann Schorsch August Wirth, sinn so ä bissel wie die Gallier beim Asterix. Un so hämmer am 27. Mai 1832 zum Fescht mit Uffmarsch zum Hambacher Schloss uffgeruffe. Do war donn des Gegreische noch de deitsche Eiheit, Freiheit un Demokradie gross. Mer hän so mit 1000 Leid gerechend un obwohl Fäsbuk noch net erfunne war, hat sich des wie e Lauffeier unner alle Leid ...a Auslänner & Diedesfelder, rumgsproche. Un owwachd... donn warn plötzlich 20.000-30.000 do! Sauwer die Hoor gschnidde....fress mei Fies....do gings rund. Schä wars a, dass soviel Weibsleid debei waren..... net was ihr dengen.... nä.... friher wars net normal, dass Weiwer sich polidisch engaschiert hän. Awwer der Iwwerzwersch vun Känisch, der Lumbesäggel, hod donn glei sei Drubbe in die Palz gschikt un hat alles Schtrewe noch Freiheit unnerdrickt. Es hod noch Johre gedauert bis mer in Freiheit endlisch hän läwe kenne! Awwer de Onfang war do bei uns in Hambach un do hän se a unser Fahn erfunne !! Proscht ihr Leid....dodruff än Schobbe!!